Tóóríg díg, âlbá dʉ́tʉ kí biís suur’íŋ jaaruŋa ka̱ɨ́ŋ, nâŋ toŋ tog ká̱ɨ́ŋ ná kɨ́eŋ ájíŋá arrá káwéŋí túllêndiŋ. Asidíg, biís namás dʉ́tʉ-sí in kwǎ: “Ottô âl rǎ̱y koo ná táárí káa.”
Dʉ́tʉ namás in kwǎ:
“Yaaŋ áláŋ koo, dúíŋ máne.”
Namás kawle ná suur ta̱bʉ́ŋ kiŋíe, teŋges teŋges ná rǎ̱y keéŋe.
Ǎlbá rǎ̱y ka̱a̱gʉl, na kɨ́eŋ ótá dǔu kayé, na kuuŋe-si ná táárí kawe, na a̱rʉ kawe, Biís namás jáá nás dʉ́tʉ-sí in beléŋ:
“Á̱jɨ́ hây! Dʉ́tʉ, ta̱bʉ sɨmmó’ŋ in’íŋ kwě ka-sí turíl írí kaáŋ gí jíŋíti?”
Ila belé-sí namás asiŋa ɨɨs na oŋŋal dog jáwíti. Dʉ́tʉ namá in jáwí :
“Á̱jɨ́ bain biís, lóó ná jɨ́ dog ja̱lʉ ná inâŋ wessé-ii, naŋ-si dǎy kɨ́rrôn innâŋ kee, íne turíl aál kee nái ká jɨ-sí írí iŋíti!”
Namá main ʉrʉ́ ka̱ldɨ́e, dʉ́tʉ namás ɨwo, in belé tullé ása á tállíŋba (Âl kóel áláŋ yee amí), namás kí máale díg in kwǎ :
“Bain biís ka-sí áisa kuga pɨe, âl jaaríŋ ná oo ná uguŋ ná á̱ɨ́ŋa.”
Ǎlbá nyaŋá áláŋ uguŋ, namás jaabíl (deém) beto ná nyaŋá nás kééŋ aala-sí in kwǎ, “Âl ɨ́de rǎ̱y sorre kee ná kóel áíláŋ yee amí.”
Biís ǎlbá dʉ́tʉ soŋŋâ ooŋo ná á ʉ́ndʉlba, namás dééŋ joiŋí’ŋ jáwla, namá nyǎŋa ná kóel, na íríŋâŋ-si ta̱rɨ́ pii : “Á̱jɨ́ dʉ́tʉ aál ja̱rɨ́ ná in jóóŋó!”
Dʉ́tʉ gal wasá ás tɨɨnelba, namá nyaŋá namaŋ jaabíl paago, namá bʉ́lóŋ ná kʉ́tɨ́ kɨ́eŋ ótá nyét bawe ná kɨ́eŋ kʉ́lóŋá-lé ká̱rɨ́e, nás kɨ́eŋ kʉ́lóŋá na póógéŋá-sí mílínynyiŋ ʉ́rrɨ́e, na kí kɨ́tóŋás pʉ́ttôn pá̱á̱gɨ́e namá dɨó ʉʉl. Yé biís namá êl ná paago na íríŋâŋ ʉrʉ́ŋá laddi nás dʉ́tʉ-sí ta̱rɨ́ pii:
“Á̱jɨ́ dúíŋ bára, aál jaŋ ná wa̱rɨ jaŋ?”
Dʉ́tʉ namás mǐŋ dǔuŋa’ŋ dǔu tɨɨna na in jáwí : “Ág, jɨ́ náis ka-sí in jámiŋ, ‘Ta̱bʉ sɨmmó’ŋ in’íŋ kwě, jɨ́ jǒel áíláŋ jâm ” . kɨ́ káíŋ jáma ayéŋá ɨɨs’íŋ-si kába na káíŋ kʉ́lóŋá-le ka̱rɨ́, naa áíŋ jʉmmóba!’”
biís namá kéé ooŋo nás pírjeŋ pii ǎl kʉ́tɨ́ kila tááríŋá pɨ̌e ná see á tɨélba. Lia namá simira taan, namás dééŋ tómbol irtino, namá nyǎŋa kí jaabil’íŋ a̱rɨ́ bi a̱rɨ́ na dééŋ tómbol laddi, na kééŋ-si kona pii :
“Ká âl sʉ̌lo’ŋ ba̱rʉ́ yɨ́o ná dombore aldo, bittân dʉ́tʉ, áláŋ á âmba!”
Kʉ́tɨ́-sí kila kona namá bát-si tullé ɨŋɨ, namá dʉ́ló tog-si pa̱a̱lɨ́e ná nyéttiŋ kʉrʉl kí kɨ́eŋ dogólâŋ, nás biís’íŋ kona tɨɨlɨ :
“Tírrígo tírrígo sá kon dony dony! Masaba leel’íŋ kwě sá kon dony dony!”
Na pʉrgʉla, na bergenya pɨe, na bawŋeli.
Ǎlbás yeeŋ kawlaŋa-lé ɨ́ɨ́rɨ́ŋóle, biís namá tómbol tɨ́ndɨ́rɨ́giŋ já̱ppɨ́a, namá main dééŋ jaaru-sí dábbiŋ tɨ̌o, asá kʉ́tɨ́ riyá pii. Namá kíeŋ sa̱kkɨ́a nás kila kʉ́tɨ́ kerŋa-sí ta̱bʉ́ŋ ere kollíŋí. Namá gal-si jáwíŋí nás ila dʉ́ló-sí tébbiŋ ʉrrɨ́, asá yeeŋ palaŋ júndíe. Lia namás dɨ́eŋ jʉrrʉ̂ŋ jáá, nyʉʉr ná íneén kɨa, nyʉʉr námá gal-si ka̱ɨŋol, namás nyét bóyé ná kí goobeŋa na kagi na ba̱rɨ lá̱ddɨ́, namá nyéttiŋ pʉɨ ná amí.
Mǐŋ ɨ́de namá yé-ii, biísá kí kʉ́tɨ́ nás suúr jɨttɨ kɨŋɨ ná kotéíŋá, áláŋ suúr kawŋíal, namaŋ ettê.
